لَـــــيـــــــــل...وأوضَـــــــــة مِـــــنـــــسِـــــيِّـــــة

Rechercher dans ce blog

Chargement...

dimanche 22 mai 2011

محاولات للتفاهة

جربت  تكون تافه قبل كدة؟
تافه..مش عارف يعني إيه تافه؟من اللي هم أقصى ثقافتهم الstatus الشهيرة الفقيعة"إذا أردت شيئًا بشدة ف..إلخ إلخ"..أيوة يا جدع وتبقى العلاقة الإنسانية بينك وبين قاعدة كابينيه حمام بيتكم أقوى من علاقتك الإنسانية بخالد سعيد وسالي زهران وسيد بلال وحسين طه..وفرحتك بالثورة تقف عند مرحلة السعادة بصورتك فوق الدبابة انت والمُزة السنكوحة بتاعتك..دة طبعًا غير حالة الانشكاح المعنوي وانت واقف بتزعق الساعة 4 الفجر"اصحوا"وبتخبط على عامود النور بالعصاية عشان تقطع خَلَف رجالة بشنبات ماكنتش تستجري تبص في وش حد منهم قبل كدة..

عارف يعني إيه تبقى تافه؟يعني تبقى حمار حصاوي مابتقولش كلمتين عدلين على بعض بس مرتاح..بتاخد على قفاك ومرتاح ومبسوط وبتتعامل مع الحياة بمنطق"إن لم تستطع مقاومة الاغتصاب فاستمتع به"..يعني تبقى حافظ كلمات أغاني تامر كلمة كلمة وآخرك في نشيدك الوطني أول كلمتين ولما تتزنق تكملها بأغنية بحبك يا حمار..يعني تبقى حمار بدرجة مواطن والمساواة الحقيقية اللي بتحققها لوطنك هي المساواة بين البني آدم والشبشب الزنوبة!

انا زمان حاولت أبقى تافه..زمان أوي..في عَقد التسعينات اللي كان بجد عقد التفاهة..لما كانت أقصى ثقافة الشاب-إلا من رحم ربي-مجلة حوادث محطوط فيها صورة لواحدة أعوذ بكلمات الله التامات من شر ما خلق ,وجنبها صورة صغيرة لأربعة آخرهم يشربوا سبرتو أحمر ,والكل على عينيهم شرايط سودا ,ومانشيت أحمر طول بعرض بيقول"حسناء بولاق ..خطفها الوحوش واغتصبوها لمدة أسبوعين"..وانت بتضرب كف بكف لأنك واثق إن الوحش الحقيقي هو الأخت صاحبة الصورة اللي غالبًا قادرة تغتصبك انت شخصيًا!
 فترة التسعينات البديعة..يا سلام..هو في زيها؟كانت الثقافة الفنية الراقية تتمثل في شاب صوته مسرسع ساند على حيطة ولابس بليزر على تي شيرت وجينز مع لقطات سريعة لبنت حواجبها تقيلة بغباء-دايمًا حواجبها تقيلة-بترقص بإيشارب وشعرها طويل متوهج من أثر الإضاءة وفلتر التصوير..
لو عايز ثقافة أرقى شوية عند يا إما تتفرج على مفيد فوزي فقط عشان تتريق عليه وهو بيقول"تسمحي لي أحرجك وأطلع كفران اللي جايبينك"و"أنا لست مذيعًا..أنا محاورًا"يا إما تنزل تأجر فيلم"إمرأة فوق القمة" ,وتتفرج على نادية الجندي وهي بترقص وتنضرب وتنهار وتعلو وتسمو وتنتقم وتصرخ وتقول"أنا عايزة أموت"..

حاولت ابقى تافه لما كان زمايلي بيتريقوا عليا في المدرسة لمجرد إني بقرا رجل المستحيل!لأ ولما شافوا معايا كتاب"العبقرية والجنون"مش فاكر لمين كانت الليلة الكبيرة!

هو الكلام قلب كدة ليه على نوستالجيا تسعيناتي؟يمكن عشان كنا تافهين ومرتاحين..بيقولوا جان جاك روسو كان بيمدح البدائيين وبيحسدهم على راحة بالهم وبيقول هؤلاء"النبلاء العراة السعداء"..يا دي النيلة..طب ما الست فيروز بتقول:"فانهضوا من قيدكم عراة أقوياء"..طيب أنا اسمع كلام فيروز ولا كلام جان جاك روسو؟أهي دي ميزة مبارك وعهد مبارك-يا جاحدين النعمة-إنه عرف يوصل للحل الوسط وخلانا عراة وخلاص عشان ينهي الجدل بين روسو وفيروز!

سقى الله أيامك يا مبارك..أديني دلوقتي متثقف متنيل على عيني بتخانق على الدستور ونظام الحكم بعد ما كان آخري  من عشرين سنة أتخانق على ستيكرات ألبوم سلاحف النينجا!

ودلوقت شبكة"رصد"بتقول قال إيه البورصة زي الفل ورأسمالها السوقي بيستعيد 7.8 مليار جنيه.. مع إننا لسة من كام يوم كنا عاملين مَعدَدَة على اقتصادنا اللي على رأي خالد الخميسي في كتاب تاكسي"عامل زي لباس المومس كل ما ترفعه ينزل تاني"!

طيب دلوقتي لسة في مشكلة ما اتحلتش..عايز أبقى تافه..ما هو لو من هنا ليوم 26 بالليل ماحدش أسعفني مش عارف حيجرالي إيه لو نزلت يوم 27 ولقيتني أنا والكام شاب اللي مقهورين على بلدهم قلة مندسة وخدم للثورة المضادة..أحيه يا جدعان دة أنا راجل صاحب مرض وباخد أدوية للجهاز الهضمي والقلب والضغط ..فاضل إيه تاني؟كدة بعد يوم 27 حيبقى في جيل كامل بيقضيها لبوس!الثورة دي لو فشلت أنا ممكن أنحرف..وشرف الدولة لانحرف..ما هو يا حنحرف يا حتيجي لي سكتة قلبية يا حبقى مثقف ثوري من بتوع خمارة الشيخ علي وقهوة التجارية..أحيه دي رابع سيجارة أولعها من ساعة ما قعدت اكتب أم النوت وعلى ما حد يعبرني حيكون جالي سرطان الرئة دة إذا الفقعة ما جبتليش سرطان البروستاتا..نهار اسود وأبقى زي عم سام كولبي بتاع"إنها البروستاتا كما تعلمون"...طب ورحمة شرف مبارك لأزروطهالكم!

ودلوقتي وأنا بكتب ألاقي لك فيديو لصبحي صالح بينتقد الإخواني اللي يتجوز من واحدة مش إخوانية!

يا جدع هات فيلم نادية الجندي ,أبو أم السياسة على أبو أم اليوم اللي عرفتها فيه!



2 commentaires:

  1. والنبي ابقى خدني معاك القهوة.. الحجرين عليّا والشاي عليك

    RépondreSupprimer
  2. والله انا كمان اتفقعت زيك واكتر
    بس هدى اعصابك وخف سجاير انت مشوفتش حصل ايه لدكتور احمد خالد توفيق بعد الشر عنك يعنى

    بس سيبك انت عجبتنى بتاعه سام كولبى انها البروستاتا كما تعلمون :D :D

    RépondreSupprimer