لَـــــيـــــــــل...وأوضَـــــــــة مِـــــنـــــسِـــــيِّـــــة

Rechercher dans ce blog

mercredi 7 septembre 2011

لو انت يساري ومانزلتش يوم 9 تبقى ثورجي عيرة!

عيش..حرية..عدالة اجتماعية...

مش دة اللي بتهتف بيه؟

طيب مش نازل ليه؟؟

ولاّ انت لقيت شكلك يجنن بتي-شيرت أحمر عليه صورة جيفارا وكوفية فلسطيني وصورة حنظلة على بروفايلك كانت حلوة والنضارة السودا الغليظة كانت حتاكل من وشك حتة ..وغير كدة خلاص؟

هي الثورية مش منهج اليسار؟فين ثوريتك يا رفيق؟

النضال الثوري مش بيقتصر على قعدات التجارية وخمارة الشيخ علي-مع تحفظي كشرقي محافظ على حكاية الخمارة-النضال الثوري نزول للشارع والتحام بالجماهير..

دة رفاقك اليساريين أكتر ناس بيلتحموا بالجماهير..

فين قعادك ف البيت من ثورية الناشطة العظيمةماهينور المصري اللي ليلة دُخلة الإسكندرانية على أمن الدولة كانت مقفلة لوحدها الشارع؟

فين شجاعتك من المناضل الرائع حسن مصطفى اللي أخد رصاصة غدر يوم حصار أمن الدولة ومع ذلك كان بيقول إن هو اللي أثّر في الرصاصة مش هي اللي أثرت فيه؟

فين قوة كلمتك وصوتك من قوة المجاهدة الوطنية الفذة نوارة نجم اللي دم الشهداء الأبرار كان بيغرق هدومها في وقت هدوم حزب الكنبة كانت غرقانة بالبارفان وعرق الخجل؟

هو مش من شعارات ومباديء اليساريين"التحم بالجماهير"؟

دلوقتي تعالى نشوف بعد كام شهر من الثورة في إيه؟

في ملايين الفقراء مش لاقيين حق الرغيف..مش عار عليك ياللي بتطالب بالعدالة الاجتماعية إن بعد الثورة يبقى من ولاد بلدك ناس همهم اليومي هو إنهم يلاقوا رغيف بايت العفن ما أكلش نصه عشان يتقاسموه مع ولادهم في أوضة ضيقة عايشة فيها ع الأقل 3 أسر؟

في لسة محسوبية ورشاوي ووسايط..في لسة كفاءات مرمية ع الرصيف في وقت واحد إمّعة بيتولى وظيفة مرموقة بالآلافات فقط عشان مؤهلاته إن عنده بابا المهم وماما الواصلة وأونكل اللي بتليفون يجيب له شغلانة شيك تليق بمقام السيادة!

في لسة طبقية سياسية وناس عاملين نفسهم نخبة مش عارف بأمارة إيه ,بيجتمعوا في الفنادق الخمس نجوم ياكلوا ويشربوا بفلوس الشعب اللي بيفرضوا وصايتهم عليه كأنه عيّل عايز اللي يغير كافولته!

في لسة سواق غلبان مضروب بالرصاص في الشارع كأنه كلب جربان فقط لأن الباشا الظابط شايف إنه"ابن الأكرمين"وإن المواطن"ابن الكلاب"!

في لسة من كام يوم بنت غلبانة منتحرة بسم الفيران عشان أهلها قرروا يطلعوها من المدرسة عشان مش لاقيين حق العلام ,في وقت بتدور فيه إدارات المدارس الاستثمارية على طرق تغلّي بيها الرسوم!

في لسة مواطن بيلعن الثورة واللي خلفوا الثوار عشان الإعلام الرسمي المضلل اللي هو بيدفع رواتب قياداته من ضرايبه بيخدعه ويفهمه إن إنت ورفاقك وزمايلك مخربين!

في لسة موظف غلبان بيبوس إيده وش وضهر وبيسبح بحمد الحكومة عشان خلت الحد الأدنى للأجور 700 جنيه مع إن حقه-طبقًا لأي معايير آدمية-على الأقل 1200 جنيه!

في لسة ناس بتفكر تقبل الدية عشان بعض المأجورين ضللوهم واستغلوا فقرهم عشان الباشوات الضباط القتلة يفلتوا يجرايمهم!!

في لسة أستاذ جامعة بيقبض ملاليم ولعيب كورة بيقبض ملايين!!

في لسة انتهاك للديموقراطية بقرارات شاهانية فرامانية عسكرية بتطلع من فوق!!


كل دة ومش عايز تنزل؟؟ والله عيب!لو كل دة ومش عايز تنزل يبقى انت مش يساري ثوري..انت واحد بيزيط في الزيطة!! وجيفارا اللي انت لابسه على صدرك لو طلع من تربته حيتف عليك!طبعًا إلا لو كنت مش مقتنع بالمظاهرات أصلاً..بس انت كدة تبقى يساري تحفة لأن المظاهرات خبز اليساري وملحه!

تعالى بقى أما نشوف الأخ اللي بينظر لنا شزرًا دة..الأخ إيه؟مالوش فيها؟طيب يعني نصنفك إيه؟ابن بلد؟

تعالى يا ابن البلد..خد لك كلمتين أبرك من 100

لو ليبرالي وما نزلتش تبقى عرّيت الليبرالية

لو ليبرالبي ومانزلتش تبقى جبتلنا العار...ويبقى صدق اللي قال الليبرالية يا برادعي يعني أمك-أيوة أمك انت-ماتلبسش حجاب!

لو ليبرالي انزل عشان المواطنة بقت بتنداس بالبيادة الميري..مفيش مواطنة يعني مفيش دولة مدنية..بقت عسكرية واللي كان كان!

لو ليبرالي انزل عشان انت هارينا كلام عن سيادة القانون...فين بقى سيادة القانون لما المواطن يتحاكم قدام قضاء عسكري لا يتيح له حقه الشرعي في استنفاذ كافة وسائل الدفاع والنقض للاجراءات والأحكام؟

لو ليبرالي يبقى لازم تحس بالإهانة لأن السلطة القضائية في بلدك بتتهان في كل لحظة ينظر فيها القضاء العسكري دعوى ضد مواطن مدني!كأن المؤسسة العسكرية بتطلع لسانها للمؤسسة القضائية وبتقول لها"اختصاصك في العشة ولا طار؟"

لو ليبرالي يبقى لازم تحس بالخطر على الحرية لما تلاقي قانون بيجرم التظاهر والاعتصام وحتى الدعوة لهم بالقلم اللي هو سلاح الكاتب الحر!

لو ليبرالي يبقى لازم تحس بالضيق لأن أخوك المواطن المغترب مش عارف يدلي بصوته وبيتشكك في ولاءه لبلده!


لو ليبرالي بجد يبقى لازم تنزل عشان انت بتطالب إن كل المناصب القيادية تبقى بالانتخاب وبتستمد شرعيتها من الشعب وبتعمل تحت رقابته..دلوقتي انت عندك وزارة منفصلة في تشكيلها عن الاختيار الشعبي ,ومنفصلة في ولاءها عن الشعب ,ومنفصلة في أهدافها وخططها عن الشعب..وزارة بتشتغل عشان ترضي المجلس العسكري مش عشان ترضيك...عندك محافظين اتحطوا كدة غصب عنك ولو مش عاجبك عندك 4 حيطان في أوضتك تضرب راسك فيهم...طيب وانت إيه؟طيشة؟ليبرالية إيه بقى اللي بتطالب بيها لما تشوف مهزلة زي دي وتقعد في بيتكم؟


لو ليبرالي بجد يبقى أكيد انت مؤمن إن الشرطة في خدمة الشعب..يعني ماتسمعش الظابط بيهتف من مايكروفون عربية الأمن المركزي ويقول"حن(لفظ بذيء بمعنى النكاح)يا ولاد الم(لفظ بذيء بمعنى المنكوحة)"..يعني ما تقراش شعر لعيل في كلية شرطة بيقول"حنفشخكم يا شعب"..يعني ما تقراش خبر إن ظابط ضرب سواق بالرصاص في عرض الطريق قدام الناس عشان اتخانقوا..يعني ما يترقاش قتلة المتظاهرين وكل واحد فيهم ياخد 7000 جنيه من فلوس الشعب..يعني ما يبقاش السفاحين مديرين أمن..يعني ما يبقاش كل اللي اتغير في أمن الدولة اسمها..يعني الأمن الوطني والداخلية كلها من كبيرها لأصغر عسكري بيعمل شاي تحت رقابة قضاء مستقل...

لو ليبرالي يعني انت مؤمن باستقلالية القضاء عشان يعرف يمارس مهامه..يعني انت مؤمن بإن القيادات القضائية بتيجي بالانتخاب مش بالتعيين بقرار سيادي..فين دة بقى؟


لو ليبرالي يعني انت مؤمن بحق المواطن في الأمن..فين الأمن؟فين التدخل الرجولي الحقيقي للداخلية عشان توقف الانفلات الأمني؟دلوقتي في 85مليون مواطن مش واخدين حقهم الطبيعي في الأمن الشخصي!

لو ليبرالي يعني انت معايا في إن اتخاذ أصحاب القرار لقراراتهم لازم يخضع لرقابة شعبية ولازم يكون مبني على مراعاة نبض الشارع..فين قناة الاتصال بين الشعب وصناع القرار؟ليه الشعب موقعه هو موقع المفعول به والمُذعِن على طول الخط؟


لو ليبرالي المفروض كل اللي فات يقلق ضميرك ويخليك مش عارف تنام...ولو كل اللي قريته دة ماخلاكش عايز تنزل تشاركنا يوم 9 سبتمبر المطالبة بيه..يبقى انت مش ليبرالي..دور لك على صفة تانية لأنك حتبقى واخد الليبرالية موضة مش اقتناع!إلا طبعًا لو انت أساسًا مش من المؤمنين بالمظاهرات فدي مسألة تانية..بس أمانة عليك ما تهبطش همة اللي مؤمنين بالمظاهرات!




سلام بقى عشان أشوف زميلك اللي لابس كوفية فلسطيني ونضارة شنبر اسود غليظ..غالبًا يساري..يساري؟تعالى تعالى..أنا حقول لك تنزل ليه..



لو انت سلفي بجد..لازم تنزل!

انتَ!
أيوة أنتَ!
انت لييييييييه مش عايز تنزل يوم 9 سبتمبر؟؟!!

طب انت عارف إنك مضطر تنزل؟في كل الأحوال لازم تنزل..أيًا كان انتماءك!

تعالى نشوف..

انت سلفي؟:-

تعالى هنا..انت علطول بتدعي ربنا في صلاتك يرزقك شرف الجهاد في سبيل الله..طيب..الجهاد شيء عظيم ,وله أجر كبير..طيب تعالى نشوف النبي-وكمان مش بتصلي ع النبي؟-صلى الله عليه وسلم..بيقول إيه؟
"أفضل الجهاد كلمة حق عند سلطان جائر"..صدق رسول الله صلى الله عليه وسلم!
أهو إحنا نازلين نقول كلمة الحق عند السلطان الجائر..السلطان الجائر غشيم في عنفه..بطيء في عدله..سريع في ظلمه..وإحنا مش حنخرج عليه..استغفر الله العظيم..لأ..إحنا رايحين نقول كلمة الحق عنده..كمان المظاهرات مش خروج على ولي الأمر..شوف فقيه مصر فضيلة الشيخ محمد عبدالمقصود عفيفي بيقول ايه..اضغط هنا

بعدين الله سبحانه وتعالى بيقول في كتابه العزيز:بسم الله الرحمن الرحيم"كنتم خير أمة أخرِجَت للناس تأمرون بالمعروف وتنهون عن المنكر"
يا عم قول صدق الله العظيم!الله؟!

انت بقى مش عايزنا نبقى خير أمة أخرجت للناس؟يبقى ليه مش عايز تخرج تأمر بالمعروف"العدل-الحق-محاسبة الفاسدين-مراعاة الفقراء"وتنهى عن المنكر"الظلم-التضليل-التستر على الفساد-طحن الفقراء ماديًا"؟


بعدين هو انت ما عرفتش؟أخَواتَك في الله مش اتعرّوا والعياذ بالله قدام رجالة واتعمل لهم كشف عذرية..دول أقل من أختك كاميليا وأختك وفاء؟فين المروءة؟فين غضبة المسلم لشرف أخته؟على فكرة هل انت آمن على نفسك إنك ما تتسألش يوم القيامة ما نزلتش ليه غضبًا ليهم؟
طيب انت شفت صورة الراجل أبو الشهيد اللي اتجرجر من قفاه؟ماشفتهاش؟راجل كبير في الستينات بيتجرجر من قفاه ع الأرض من ظابط أمن مركزي!دة يرضي ربنا؟طيب يرضي المسلمين؟

إيه؟الشيخ قال بلاش ننزل؟مفسدة؟وانت عقلك فين؟انزل وبص من بعيد..لقيت مفسدة وتخريب امشي..ما لقيتش شارك..انت عارف إنك لما بتمشي في مظاهرة لك أجر مجاهد ولك بكل خطوة تخطوها أجر ولك كمان سيئات بتتغفر لك؟الواحد محتاج الأجر ومحتاج يلاقي فرصة يتغفر له..يا عم شارك..حتخسر إيه؟ولا حاجة..ولو لقيت منكر في المظاهرة برضه حتاخد أجر لأنك حتنصح إخوانك في الله مايعملوش المنكر دة..ولو ماسمعوش كلامك أديك أخدت الأجر وكمان غيرت المنكر بلسانك وبقلبك..شفت بقى؟


انت عارف قصة البلدة اللي ربنا أمر الملائكة بتدميرها وإنزال العذاب على أهلها؟الملائكة قالوا لله تعالى:"فيها رجل مؤمن"فقال لهم:"فبه فابدئوا!"
سبحان الله
ليه؟عشان الراجل دة كان ماشي جنب الحيط ومش بيقول كلمة الحق في وجه السلطان الجائر..


إيه؟خايف تلاقي المظاهرة اتحولت لمطالب انت رافضها زي الدستور أولاً ونعم للمباديء فوق الدستورية؟يا سيدي مش حتتحول بإذن الله..وعموما انزل..لقيتها اتحولت امشي..انت خسران حاجة؟أهو حتى تتمشى والمشي رياضة


عرفت ليه لازم تنزل؟


تعالى بقى أما نشوف زميل..انت إيه؟ليبرالي؟استناني هنا شوية وحاجي أقول لك ليه لازم تنزل!




dimanche 4 septembre 2011

بيقول لك الشواذ في الجنة ربنا حيديهم"غلمان مخلّدين"!

الست إيناس الدغيدي طالعة في برنامج"القاهرة اليوم"تفتي وتقول إن ربنا وعد المؤمنين الشواذ إن حيبقى لهم في الجنة"ولدان مخلدون"اللي هم الغلمان اللي شكلهم حلو!!

أنا مش عارف هي شافت الكلام دة في أنهي تفسير؟الكلام اللي الهانم بتقوله يوم ما يتكتب مش حيتكتب في تفسير..حيتكتب في مجلة بورنو!

يا ست يا مخرجة ياللي محسوبة على المثقفين في غفلة من الثقافة التفسير للوعد القرآني للمؤمنين بالولدان المخلدون هو وعد بيهم على سبيل إنهم"زينة ومتعة للنظر"..يعني مثلاً إنتي لما بتشوفي طفل شكله جميل أو طفلة أمورة مش بيبقى منظر مبهج؟ولاّ هي كل حاجة لازم تتاخد على ورا؟!

بعدين على فكرة الحكاية بتاعة"الولدان المخلدون دول وعد بالمتعة الجنسية اللي كانت محرمة في الدنيا زي ما خمر الجنة وعد بمتعة نشوة الخمر اللي كانت محرمة برضه ولا لأ؟"اتكلم فيها بعض الفقهاء قبل كدة..واتفق الآراء الراجحة كلها إنها مجرد متعة نظر ولأن الإنسان المحب للجمال بيرتاح لمنظر الأطفال كجزء من حبه للطبيعة الجميلة..بيرتاح بس مش بيهيج..وممكن تتأكدي من دة في كتاب الإمام الكبير جلال الدين السيوطي"نواضر الأَيك في معرفة النَيك"..

كمان حاجة..الشذوذ الجنسي مرض نفسي..مش مجرد ميل جنسي طبيعي وفروق فردية..دة مرض نفسي والمصاب بيه بيصنفوه كمريض مش كواحد صاحب اختيار.. كون إن بعض الدول المنفتحة على المجتمع من بابه الخلفي لغت كلمة"شذوذ جنسي"وحولتها ل"مثلية جنسية"واعتبرت إنه مش مرض فدة لا يلغي حقيقة إنه مرض..وكقاعدة فأي ميل عند الإنسان لشيء مخالف للفطرة ,زي الميل الجنسي لنفس نوعه ,أو الميل للأذى وتعذيب الآخرين ,أو الميل للتعرض للتعذيب ,كل دي بتحط صاحبها تحت تصنيف"غير سوي"!
وبالعقل كدة..مش ربنا وعد أصحاب الجنة إنه حيرجع لهم شبابهم وصحتهم؟يعني إيه؟يعني اللي عنده السُكَر هل حييجي يدخل الجنة وهو عنده السكر ويبقى بتجري من تحته أنهار الأنسولين؟ولا حيدخلها شاب سليم صحيح؟أهو نفس الكلام..المصاب بالمرض دة-الشذوذ الجنسي-لو صبر على مرضه واعتبره ابتلاء وسعى للعلاج واجتنب الممارسة الجنسية الشاذة فدة-وفقًا لكلام العلماء-حيكون وضعه عند ربنا نفس وضع الصابر على الابتلاء ,وجزاءه الجنة والبراءة من المرض..يبقى بالعقل حتلاقي إزاي واحد داخل الجنة ونفسه في العيال؟!!

بعدين إيه بقى حكاية"اتفلقوا"دي؟أصل الأخت بتقول إن المفروض المجتمع يوصل بالحرية لمرحلة إني كأب لو لقيت ابني جاي لي ماسك إيد واحد صاحبه وبيقول لي"بحبه ونفسي فيه يا بابا"أقول له"اتفلقوا"!حياة ماما؟!!تصدقي ماما حلوة؟!!

اتفلقوا دي لما يشرب سجاير..ما يذاكرش..إنما مش لما يرتكب جريمة في حق المجتمع والنوع البشري وحق الطبيعة في سيرها زي ما ربنا خلقها!أمال ربنا نزّل الحدود ليه؟البشر عملوا القوانين الوضعية ليه؟المجتمعات توارثت التقاليد والأعراف ليه؟عشان نقول للشواذ"اتفلقوا"؟!!

والله لولا إن الواحد مش عايز يبقى هايف كنت قدمت ضدك بلاغ بتهمة التحريض على الفجور وإزدراء الأديان!

عالم تفقع!

قابل يا سيدي..وكنا زعلانين إننا اتحرمنا من تسلية القذافي..أدي ربنا بيقطع من هنا وبيوصل من هنا!

كلمة بقى أخيرة..الأخت دي وأشباهها بيتمَسّحوا في الليبرالية..والله العظيم ما ليبراليين..الليبرالية من أهم ضوابطها احترام حقوق وحريات المجتمع وضوابطه اللي اختارها بنفسه..والكلام اللي هي قالته دة مفيهوش أدنى احترام لا لحق المواطن في ألاّ يُعتدى على مقدساته ولا حرية الجماعة البشرية المصرية في الاتفاق على تجريم الفجور ولا ضوابط الدين والأخلاق اللي المصريين اختاروا الالتزام بيها!جتكم القرف جبتوا لنا الكلام!

انا كمصري وكمسلم وكليبرالي بتبرأ من الهبل دة!