لَـــــيـــــــــل...وأوضَـــــــــة مِـــــنـــــسِـــــيِّـــــة

Rechercher dans ce blog

jeudi 16 février 2012

اعدموا عبدالرحمن موافي!

أنا لا أطالب بالحرية لعبدالرحمن موافي..لا يا سادة...دعونا من المثاليات الحمقاء وانظروا معي للجانب العلمي من الأمر..

عبدالرحمن شاب عمره 19 سنة..يدرس بكلية الهندسة..يحب الموسيقى والقراءة الأدبية..مشهور بالتهذيب والبراءة الشديدة لدرجة أني أكاد أجزم أنه لا يعرف لماذا تبيض الدجاجة..هذا شاب سيعاني أصدقاءه كثيرًا في إعداده وتسليحه بالمعلومات اللازمة لليلة زفافه!فضلاً عن وضع أيديهم على قلوبهم حتى تمر تلك الليلة على خير دون أن يحرر بحق عروسته محضر تحرش!

في نفس الوقت..ووفقًا لورق الحكومة فعبدالرحمن متهم بالآتي:
-1-حيازة سلاح بدون ترخيص.
-2-التحريض على التجمهر.
-3-تخريب الممتلكات العامة.
-4-حيازة مخدرات على سبيل الأجر لنشاطه التخريبي.

إن أي متخصص في علم الإجرام سيرقص طربًا وهو يقرأ عن النموذج الإجرامي لعبدالرحمن موافي..نحن أمام شخص يستيقظ فيتعامل مع الجميع برقي وتهذيب ثم يغلق على نفسه غرفته ليستمع لمحمد منير وعبدالوهاب وهو يتصفح كتابًا لنجيب محفوظ ويفكر في طرق جديدة لإسقاط الدولة.. الحمد لله أني-قبل أن أموت-قد رأيتُ هذا النموذج من المجرمين في مكان آخر غير روايات رجل المستحيل وملف المستقبل..وإن كنت أتسائل أين يجد عبدالرحمن في غرفته مكانًا لحوض أسماك البيرانا المتوحشة التي يلقي إليها ضحاياه!(راجع روايات رجل المستحيل)

وحتى بعد انتهاء البحث والفحص ل"عينة"عبدالرحمن ,لن أطالب له بالحرية بل بالإعدام الفوري..فهو حتى وإن كان كشفًا علميًا فذًا إلا أن وجوده في هذه الحياة كفيل بإفساد الصورة النمطية للمجرم البلطجي وتلك الصورة النمطية الأخرى ل"شباب الثورة المتطاهر"..ونحن كشباب غيورين على الوطن لا نريد للمواطن المصري الصالح أن يصاب باللخبطة بين كلام أصدقاء عبدالرحمن وكلام الحكومة..فالأفضل إذن أن نقضي على سبب الخلاف ونعدم عبدالرحمن موافي لنريح ونستريح!وأرجو ألاّ أسمع مجددًا إسطوانه"عبدالرحمن مش بلطجي دة طالب هندسة"..فبعد القبض على عبدالرحمن في أحداث وزارة الداخلية ,ومن قبله استشهاد محمد مصطفى طالب الهندسة في أحداث مجلس الوزراء ,ومن قبلهما القبض على المهندس خالد صلاح وطالب الهندسة أحمد علي في أحداث وزارة الدفاع ,تأكدتُ من صحة مقولة عادل إمام في فيلم عمارة يعقوبيان:"البلد دي مش عايزة مهندسين..عايزة صِيَّع"!


mercredi 1 février 2012

عشان ماليش في سبّ الأديان!أصل سبّ الدين حرام!

هل تعلم أن شتيمة"يا ابن ديك الكلب"ليست تحريفًا ل"يا ابن دين الكلب"وإنما هي ببساطة"يا ابن ذيكَ الكلب"؟!

إيه علاقة دة بموضوعنا؟لا شيء..فقط جت بالمناسبة عشان أنا قاعد طول الليل ماسك السبحة أم 99 حباية وعمال أقول"سب الدين حرام..سب الدين حرام"!

بعدين قمت واخد حبّاية مضاد الاكتئاب ونمت..وبرضه عمال أصحى كل شوية أقوم ماسك السبحة وأفكّر نفسي إن سب الدين حرام!

ما هو أصل اللي حصل البارح عيب وحرام ويهز عرش السماوات...مش كدة يا بديع مش طريقة دي..دة الواحد بيدعي ربه يثبت له العقل والدين وإنت حتخلي عقلنا يفلسع وكنت حتخليني أسب الدين يعني كنت حطلع من الملّة أصلاً!

والله العظيم تلاتة البارح عمّال أقرا على تويتر كلام لناس موثوق فيهم عن ناس كانوا بيلطموا في الشارع وبيعيطوا وبيستغفروا ربهم إنهم انتخبوا الإخوان!ناقص إيه؟نعمل لك مظاهرة بلابيص عند المقر الرئيسي؟أيوة عشان تبقى سبوبة وتقول:"شوفوا الليبراليين الكفرة بيمشوا بلابيص وبيسبوا الدين!"بس دة بعدك يا بدعدع!

تعالوا بقى نفكر بشويش أحسن بديع حيرفع لي الضغط:


-1-الإخوان أخدوا الأغلبية في البرلمان.
-2-البرلمان أغلبيته إخوان(عشان اللي بيفهموا من ورا..إحم..قصدي بالمقلوب يعني)
-3-البرلمان هو المؤسسة الشرعية الوحيدة المنتخبة في مصر.
-4-الثوار نزلوا البارح يطالبوا العسكر بتسليم السلطة للبرلمان.يعني نازلين يدعموا البرلمان عشان وهو بيتفاوض مع العسكر على تسليم السلطة يحس إنه مستقر ومسنود وضهره دفيان..لأنه لو ماكانش ضهره دفيان بالثوار فممكن ياخد لطشة برد في العضلة الخلفية..وطبعًا العسكر ما حيصدق وحيقول له:طب نام على بطنك أعمل لك مساج!
-5-البرلمان اللي أغلبيته إخوان(بنفكر تاني التكرار بيفيد الإخواني)
-6-الشرعية الرسمية للبرلمان-الشرعية الشعبية للميدان.
-7-الشعب مصدر السلطات.
-8-طيب تبقى المعادلة كالآتي:
(الثوار/الشعب/الشرعية الشعبية)--رايحين->ل(البرلمان المنتخب/الشرعية الرسمية)---بيطالبوه ياخد--->(السلطة اللي مصدرها الشعب)
 =(الثوار مع الشرعية)

-9-الإخوان بعتوا الميليشيا بتاعتهم تقطع الطريق لمجلس الشعب عشان توقّف الثوار..قال إيه عشان المتظاهرين دول فصيل ضد الشرعية عايزين يسقطوا البرلمان..والبرلمان أصله لسة في الشهر الأول والحمل مش مستكن!
-10-قبضايات الإخوان استعرضوا قوتهم وهددوا المظاهرة بالتلويح بالقوة(مع إن قطع الطريق ارتكاب للركن المادي من فعل الحرابة)(ملحوظة:الإخوان مسلمين على فكرة)
-11-حصل شد وجذب وضرب واعتداءات من قبضايات الإخوان على المتظاهرين السلميين ,وحصل خطف لمتظاهرين وتسليم لهم للداخلية..والإخوان اضطروا ينسحبوا لأن المتظاهرين بقوا بتاع 10000 والألتراس وصلوا ودة معناه إن كان حيتعمل على شباب الإخوان حفلة كانيباليزم(أكل لحوم بشر)
-12-عشان بس مفيش فلوطة-لامؤاخذة يا أستاذ صبحي-يطلع لنا:التظاهر حق مشروع-المرور في أي شارع غير مغلق رسميًا حق مشروع-مش من حق جهة غير رسمية منع المرور(دة الأمن المركزي سابهم يعدوا)-يبقى اللي يمنعني من المرور بيعتدي عليا وساعتها ليا حق الدفاع عن نفسي حتى لو ضربته لأنه مرتكب لفعل البلطجة وقطع الطريق!يبقى اللي حصل لشباب الإخوان هناك مجرد دفاع شرعي بريء عن النفس..هم إيه اللي خلاهم يقطعوا الطريق؟أنا راجل متظاهر سلمي..من حقي قانونًا أمشي في الشارع..انت ليه توقفني؟

طيب يعني الإخوان اعتدوا على الثوار..الثوار اللي نازلين يطالبوا بتسليم السلطة للبرلمان...البرلمان اللي أغلبيته إخوان..يعني رايحين يقولوا للإخوان"خدوا السلطة"!

طيب حيث إن مدام انشرح موبايلها مقفول وشكلها كدة اعتزلت نشاطها القديم وحتشتغل في قناة الناس..إحنا محتاجين متطوعة قوية الحنجرة سليمة الأنف واللحمية وتكون مُطّلعة على فنون تراث الاعتراض السكندري..


والإخوان يظهرلما اتقال لهم"خدوا السلطة"اتوجعوا من كلمة"خدوا"دي..طب كنتم قولوا"اتفضلوا"يا جدعان حتى وقعها على الأذن مالوش أي محامل سيئة!وانتو يا إخوان يعني زعلتم أوي من"خذوا"دي؟هي أول مرة تاخدوا؟ولسة ياما حتاخدوا..قصدي حتتفضلوا!

يعني البارح الخناقة كانت عشان شوية ثوار قلالات الأدب-أراذل على رأي السادات الله يرحمه-طالبوا البرلمان اللي أغلبيته إخوان ياخدوا السلطة قام الإخوان من فرط حبهم في الديموقراطية وزهدهم في الملك ضربوا الثوار دول... عَبوكم ع الصبح! أمال 80 سنة شغالين ..وهاريينا"وأعدوا"و"نحمل الخير لمصر"..وأمن الدولة يشدكم أيام المخلوع ,ووحيد حامد يكتب مسلسل"الجماعة"بالتعاون مع ورشة كتابة السيناريو في أمن الدولة ,وعادل إمام يهرينا خلط بينكم وبين السلفيين وبين الجهاديين...ومهدي عاكف يتحفنا إيشي طز في مصر وإيشي حنضرب المعارضين بالجزمة ,وصبحي صالح يطلع لنا بنظرية الفلوطة ,كل دة عشان لما نقول لكم خدوا-قصدي اتفضلوا-السلطة تغنوا لنا"لا والنبي يا عبده"!

ما عرفتكوش أنا كدة!!


طب ممكن تفسير؟عشان أنا قربت أوصل لآخر السبحة ال99 ولسة ببذل قصارى جهدي لإقناع نفسي إن سب الدين حرام! إيه خايفين تاخدوا السلطة ليه؟ تكونوش خايفين لما تاخدوا السلطة تبقوا في وش العسكر مباشرة وتدخلوا معاه في خلوة؟طب دي ع الأقل حتبقى خلوة شرعية بدل ما انتو ماشيين معاه عرفي..دة انتو وانتو ماشيين سوا سوا ناقصكم في المشهد الصخرة اللي ع البحر اللي مكتوب عليها"أترضاه لأمك؟!"! بعدين هو إحنا حنسيبكم لوحدكم مثلاً؟
ويا سيدي لو حاسّين إنكم مش قدّها وصلوا لنا الفكرة بشكل مؤدب..مش لازم ضرب وشرشحة وشغل النسوان الفولجير دة..كفاية تحطوا وشكم في الأرض وتقولوا"أخاف أن لا أقيم حدود الله"وإحنا حنفهم..

المشهد البارح كان سيريالي فشخ! خناقة بين فئتين..فئة عايزة تدي الفئة اللي بتضربها السلطة وفئة بتضرب الفئة اللي عايزة تديها السلطة...ماكانش ناقص غير وسط الخناقة يظهر عمرو أديب ويقول بصوت عالي"طب والمشير؟!"
فيصمت الجميع وتتجمد الصورة ثم يقولون كلهم بذهول:"إيه؟!" ويظهر أحمد شفيق وخلفه عبدان يقذفان البونبوني ويقول لعمرو أديب"انت فاكر انا بس اللي كدة؟"

فينفجر الكل في الضحك ويتبادل الثوار والإخوان القبلات"طرقعة-حنك-لحوسة-مشبك"ويتجهون جميعًا لإحراق كلا من وزارة الدفاع ومكتب المرشد في احتفال شعبي مهيب ويرسلون رسالة لعمرو مصطفى أن عليه حل هذا اللغز والبحث عن المؤامرة خلال 24 ساعة وإلا فإنهم حيطلعوا ميتين أمه!وانا اقترح تطليع ميتين أمه في كل الأحوال مناصفة مع توفيق عكاشة!